Shtetet anëtare të Bashkimit Evropian dhe Japonia kanë arritur marrëveshje për tregti të lirë. Marrëveshja ka hyrë në fuqi sot dhe do të ketë ndikim te 635 milionë njerëz të këtyre vendeve.
E vlerësuar si marrëveshja më e madhe në botë për tregti të lirë, Marrëveshja për Partneritet Ekonomik mes BE-së dhe Japonisë përfshin heqjen e taksave për pothuajse të gjitha prodhimet bujqësore dhe industriale dhe e bën më të hapur tregun e shërbimeve. Komisioneria e BE-së për tregti, Cecilia Malmstrom, ka thënë se kjo marrëveshje i ka të gjitha elementet e nevojshme për të sjellur përfitime nga tregtia e hapur.
Në anën tjetër, shefi i Federatës Japoneze të Biznesit, Hiroaki Nakanishi, ka thënë se marrëveshja do ta stimulojë rritjen e mëtutjeshme të bizneseve dhe do të krijojë vende të reja pune për të dyja palët. Arritjen e marrëveshjes e ka përshëndetur edhe president ii Këshillit të Evropës, Jean-Claude Juncker. “Marrëveshja e re do t’iu ofrojë konsumatorëve zgjedhje më të shumta dhe çmime më të ulëta”, tha ai.
Në mesin e pikave të marrëveshjes përfshihet heqja e taksave nga Bashkimi Evropian për 99 për qind të prodhimeve të Japonisë, heqja e taksave për prodhimet bujqësore dhe ushqimore dhe përmbushja e zotimeve të dhëna në Marrëveshjen e Parisit, shkruan “DW”, transmeton Gazeta Express.
