Aleanca Kosova e Re ka dal me qëndrim zyrtar pas zhvillimeve rreth Gjykatës Speciale, duke thënë se paralajmërimet e SHBA-ve që shfuqizimi i dhomave të specializuara, janë thika pas shpine për aleatin tonë historik, duhet të trajtohen seriozisht në funksion të një të ardhme të sigurt për shtetin dhe shoqërinë tonë.
AKR nëpërmjet një komunikate thotë se raportet e Kosovës me aleatët e përhershëm nuk duhet të sfidohen asnjëherë. Sipas AKR-së, e kaluara na dëshmon se çdo veprim i pakoordinuar me ta, i ka kushtuar shume vendit dhe të ardhmes sonë.
“Në këto momente të rëndësishme dhe në këtë situatë të ndjeshme, i ftojmë të gjithë që të tregojmë maturi dhe të jemi të përgjegjshëm, ngase është në pyetje fati i Kosovës. AKR është e vendosur që veprimet politike dhe institucionale t`i ndërmerr gjithmonë në funksion të interesit të shtetit dhe në koordinim të plotë me SHBA-të dhe BE-në. Paralajmërimet e SHBA-ve që lëvizjet e fundit politike rreth shfuqizimit të dhomave të specializuara, janë thika pas shpine për aleatin tonë historik, duhet të trajtohen seriozisht në funksion të një të ardhme të sigurt për shtetin dhe shoqërinë tonë. Në të kundërt mund të rrezikojmë të humbim gjithçka që kemi investuar në ndërtimin e shtetit tonë”, thuhet në komunikatë.
AKR shton se lufta jonë për liri ka qenë e pastër dhe ne nuk i frikësohemi askujt, prandaj jemi të bindur se edhe kjo Gjykatë do ta dëshmojë pastërtinë dhe misionin liridashës të kësaj lufte./KosovaPress/
