Koalicioni parazgjedhor ndërmjet LDK-së, AKR-së dhe Alternativës një ditë më parë deklaruan se do t’i drejtohen Gjykatës Kushtetuese me dy pyetje lidhur me rastin e zgjedhjes së kryeparlamentarit, respektivisht bojkotimin e PAN-it ndaj vazhdimit të seancës konstituive.
Këtë iniciativë e shpalosi në Kuvend, Shefi i Grupit Parlamentar të LAA-së, Avdullah Hoti, shkruan AktivPress.
Edhe pse Hoti këtë nismë e prezantoi duke përfaqësuar tërë pjesëtarët e koalicionit, duket se barrën e shkuarjes së kësaj pune deri në fund do ta mbajë subjekti pjesë e së cilit është vet ai.
AktivPress ka kontaktuar deputetët e subjekteve politike AKR dhe Alternativa, por ata nuk kanë pasur qëndrim rreth përpilimit të kërkesës së koalicionit për Gjykatës Kushtetuese.
Deputeti i AKR-së, Korab Sejdiu në një përgjigje për AktivPress ka deklaruar se për këtë çështje mund të flasë Avdullah Hoti, pasi sipas tij, ai është duke e koordinuar veprimin për kërkesën që do ta dërgojnë në Gjykatën Kushtetuese.
Me të njëjtën qasje është përgjigjur edhe deputetja nga radhët e Alternativës, Mimoza Kusari-Lila.
Ajo ka deklaruar për AktivPress se lidhur me këtë çështje është më mirë të flasë Avdullah Hoti si iniciator i kërkesës.
Gazeta online “AktivPress” ka provuar të marrë një qëndrim edhe nga Hoti për këtë çështje, por kontakti me të ka qenë i pamundur.
Koalicioni LAA, dje gjatë vazhdimit për herë të pestë me radhë të seancës konstituive, ka paraqitur vendimin e tyre për t’iu drejtuar Gjykatës Kushtetuese me dy pyetje lidhur me bllokadën që po krijon PAN-i për mos-propozimin e kandidatit për kryepalamentar.
Sipas Avdullah Hotit, pyetja e parë ka të bëjë me mospjesëmarrjen në seancë dhe mos-prezantim të kandidatit për kryetar të Kuvendit, a konsumohet e drejta kushtetuese për të pasur kryetarin e Kuvendi?
“Dhe e dyta, çka ndodh në rast kur një kandidati që propozohet për kryetar të Kuvendit nuk e merr mbështetjen e nevojshme?”, tha Hoti./
