Gjykata Kushtetuese pak minuta më parë ka marrë vendim që ta pezullojë Ligjin e ri të Pagave deri në mars të vitit 2020.
Mirëpo, me këtë vendim të Kushtetueses nuk po pajtohen asesi Sindikata e Policisë së Kosovës, shkruan FaktePlus.
Nënkryetari i Sindikatës së Policisë, Shaban Tasholli këtë vendim e ka quajtur katastrofal.
Ai ka thënë se kanë qenë dhe janë kundër pezullimit të Ligjit për Paga.
“Vendimi i Gjykatës Kushtetuese është katastrofal. Ne kemi qenë kundër dhe prapë jemi kundër. Këtë vendim që e ka dhënë Gjykata pas dy vjete punë që është bërë në Qeverinë e Kosovës, të anulohet kjo nuk është e drejtë”, ka thënë Tasholli për FaktePlus.
Ai, ka thënë s enuk ajën kundër vendimeve të Gjykatës Kushtetuese, por këtë vendim e ka quajtuar të pamatur.
“Ne nuk jemi kundër saj, por për mu është një veprim i pamatur”, ka thënë ai.
Ndërsa, i pyetur se si do të veprojnë pas këtij vendimi, Tasholli ka thënë se do të takohen me Këshillin Drejtues të sindikatës dhe do të vendosin.
“Tani e tutje nuk e di se çka do të bëjmë, nesër e kemi mbledhjen e Këshillit Drejtues dhe do ta shohim se çka do të bëjmë më tutje. Jo nuk e dime se si do të veprojmë, ne i kemi pritur rrogat me rritje. Gjykata Kushtetuese paska marrë vendim, është e papritur për neve, nuk di se çka të them tjetër, pra nesër do të takohemi dhe do të ndërmarrim veprime të mëtutjeshme”, ka thënë Tasholli për FaktePlus.
Kurse, nesër Sindikata e Arsimit dhe ajo e Shëndetësisë do të mbajnë greva.
Sindikata e Arsimit do të fillojë me grevë dy orëshe, ndërsa ajo e Shëndetësisë nga ora 07:00 e mëngjesit deri në orën 15:00 të pasditës./FaktePlus
