Pasi ka përfunduar procesi i rinumërimit të 530 vendvotimeve dhe verifikimi i zarfeve me fletëvotime që kanë ardhur nga Serbia, tani pritet që të fillojë edhe procesi i numërimit të votave me kusht dhe atyre të personave me nevoja të veçanta.
Sipas zyrtarëve të KQZ-së numërimi i këtyre votave do të nis sot në ora 16:00 në Qendrën për Numërim dhe Rezultate.
“Sot pritet të fillojë numërimi. Edhe këto vota do t’i nënshtrohen kontrolleve, krahasimeve dhe verifikimeve me votuesit e rregullt dhe atëherë do të kemi të qartë se sa prej tyre aprovohen dhe sa refuzohen”, deklaroi Elezi
Ai tha se vetëm fletëvotimet e aprovuara numërohen.
E numri i votave me kusht në nivel vendi është rreth 26 mijë e 400, ndërsa numri i votave të personave me nevoja të veçanta është rreth 2 mijë e 150.
Zgjedhjet e 6 tetorit u zhvilluan në 38 komuna në 895 qendra të votimit me 2,547 vendvotime. Nga 25 subjekte politike garuan 1,067 kandidatë për deputetë.
Në zgjedhje morën pjesë 44 për qind e qytetarëve me të drejtë vote, derisa 29 persona u arrestuan për shkelje gjatë procesit zgjedhor.
Bazuar në rezultatin e deritashëm të Komisionit Qendror të Zgjedhjeve, Lëvizja Vetëvendosje del të jetë fituese e zgjedhjeve të parakohshme parlamentare të 6 tetorit. Pas VV-së, me numër më të madh të votave renditen Lidhja Demokratike e Kosovës dhe Partia Demokratike e Kosovës.
