Zyra e Kryeministrit të Kosovës ka reaguar pas publikimit të lajmit se kjo zyrë ka porositur laptopë në vlerë prej mijëra eurosh.
Zyra e Kryeministrit të Kosovës përmes një reagimi ka bërë të ditur se nuk ka porositur laptopë për këtë zyrë e që vlera e një laptopi ka kushtuar 1 mijë euro.
Sipas reagimit, këto porosi janë bërë nga Zyra e Koordinatorit Nacional për Rini, Rexhep Hoti, për siç thuhet nevojat e projektit të tij për rininë.
Reagimi i plotë i Zyrës së Kryeministrit:
Zyra e Kryeministrit për hir të informimit të drejtë të qytetarëve, reagon ndaj shkrimit në mediet e shkruara, që për burim kanë portalin B.E, ku përmendet që Zyra e Kryeministrit ka porositur llap top në vlerë prej një mijë euro.
Për informimin e drejtë, Zyra e Kryeministrit ka shumë Agjenci që operojnë në kuadër të saj. Porosia në fjalë është bërë nga Zyra e Koordinatorit Nacional për Rini, z. Rexhep Hoti, për nevojat e projektit të tij për rininë.
Përkundër sqarimit paraprak për portalin në fjalë se në emër të kujt është bërë porosia, prodhuesi i lajmit ka refuzuar ta bëjë sqarimin e duhur për opinionin.
Ky refuzim, konsiderojmë që po bëhet me qëllim të etiketimit dhe njollosjen e personave që janë të apostrofuar dhe në fotografinë me të cilën është ilustruar lajmi. /Lajmi.net/
