Sot Presidenti Hashim Thaçi prezantoi një deklaratë të përbashkët me homologun e tij nga Mali i Zi Filip Vujanoviq në lidhje me demarkacionin. Në deklaratë thuhet se një grup punues i përbashkët mund ta korrigjojë kufirin në sektorët e Çakorrit dhe Zhlepit.
Ndërsa, sa i përket kryeparlamentarit Kadri Veseli votimi i marrëveshjes së Demarkacionit ku do të figuronte edhe ky aneks mund të bëhet para seancës solemne që do të mbahet për nder të 10 vjetorit të Pavarësisë, shkruan Gazeta Metro.
Veseli u shpreh kështu në takimin që liderët zhvilluan me shefen e zyrës së BE-së, Natalya Apostolova.
Seanca solemne është e paraparë për datën 18 shkurt (e diel), duke lënë kështu mundësi që Demarkacioni të dërgohet për votim në orët e vona të ditës së sotme apo që deputetët për 10 vjetorin e pavarësisë (17 shkurt) të kenë përpara aneks-marrëveshjen e marrëveshjes së Demarkacionit me Malin e Zi, e cila ka mbajtur peng skenën politike që 3 vjet.
Mirëpo, nuk përjashtohet as mundësia që për Demarkacionin të votohet në ditën e seancës solemne. Seanca është e paraparë për në orën 12:00, ndërsa votimi mund të bëht në një seancë të thirrur për orët më të hershme të datës 18 shkurt. /gazetametro.net
