Drejtoresha e Klinikës Infektive në Prishtinë, Lindita Berisha-Ajazi ka konfirmuar se gjithsej 11 pacientë janë duke u trajtuar nga pandemia Covid-19, në këtë klinikë, raporton “Front Online”.
Sipas saj 2 janë në gjendje të rëndë shëndetësore.
“Sot deri në këtë moment në Klinikën Infektive i kemi 11 pacientë të cilët janë me Covid pozitiv dhe që janë duke u trajtuar në Klinikën Infektive. Prej këtyre pacientëve 4 janë me oksigjeno terapi, 4 në reparte ndërsa 2 janë në mjekimin intensiv të klinikës pra janë në gjendje të rëndë shëndetësore, krahasuar me pacientët e tjerë që janë në reparte”, ka konfirmuar ajo.
Drejtoresha e Infektives ka pohuar se të dy kanë edhe sëmundje të tjera shoqëruese.
“Pacientët të cilët janë në mjekim intensiv janë pacientë të cilët kanë edhe sëmundje të tjera shoqëruese dhe janë nën përkujdesje të infektologëve dhe anesteziologëve në mjekimin intensiv të Klinikës”, ka thënë ajo.
Në anën tjetër në Infektivë janë edhe 3 raste që pritet të testohen sot, për të parë nëse janë pozitiv me SARS-Covid-2.
“Në Klinikë i kemi edhe 3 raste që janë të shëruar por që duhet që të vazhdojë ende trajtimi i tyre dhe në këtë moment i kemi 3 që janë në pritje të rezultateve”, ka thënë drejtoresha e kësaj Klinike
Për sa i përket rritjes së numrit të të infektuarve këtyre ditëve, Berisha-Ajazi ka thënë se është shqetësuese.
“Normal që është shqetësuese për të gjithë, besojmë që qytetarët do të kenë durimin edhe pak këtyre ditëve të fundit që të respektojnë distancën dhe masat e vendosur që janë të rekomanduar nga IKSHPK-ja, që në fund të mos lejojmë që të na kthehen rastet ashtu siç i kemi pasur në fillim”
Në ndërkohë në Klinikën Infektive nuk ka asnjë nga personeli shëndetësorë që është në vet izolim apo që dyshon që është i prekur nga Coronavirusi.
“Deri më tani nuk kemi personel të Klinikës Infektive që janë të dyshimtë ose që janë në vet izolim. I gjithë stafi është në Klinikë dhe në punë”, ka thënë ajo.
Kosova ka 927 raste me koronavirus, prej tyre 671 të shëruar dhe 29 me përfundim fatal. IKSHPK sot ka bërë serish thirrje qytetarëve që të vazhdojnë me respektimin e masave të institucioneve shëndetësore për parandalimin e përhapjes së koronavirusit.
