Kohëve të fundit nuk janë të rralla rastet kur pacientë me sëmundje të ndryshme kërkojnë fonde për t’u trajtuar jashtë vendit, pasi që një gjë e tillë nuk mund t’iu ofrohet në Kosovës.
Rasti i fundit është i tre vjeçarit nga Podujeva, Besim Kurtolli, i cili kishte nevojë për transplant të veshkave, për çka i nevojiteshin 250 mijë euro, por falë vullnetmirëve, ai tashmë gjendet në Gjermani, transmeton Indeksonline.
E sikur Besimi ka qindra raste, e madje edhe disa që përfundojnë me vdekje, për shkak të mungesës së parave, që arrijnë shuma të mëdha.
Lidhur me këtë, zëdhënësi i Ministrisë së Shëndetësisë, Faik Hoti ka thënë për Indeksonline se sipas aplikimeve në zyrën për Trajtim Mjekësor Jashtë Institucioneve Publike Shëndetësore brenda 6 mujorit të parë të këtij viti, numri i aplikantëve është më shumë se 1 mijë.
“ Në zyrën për TMJISHP gjatë këtij viti (1 janar- 30 qershor 2016) kanë aplikuar 1017 pacientë. Deri më tani kanë përfituar rreth 495 prej tyre ku shuma totale e shpenzuar është rreth 3.371,385.€”, ka thënë Hoti.
Po ashtu, sipas tij, pas qershorit, në muajt korrik e gusht gjithashtu një numër tjetër i pacientëve kanë marrë mjekim përmes këtij programi.
Hoti ka shtuar se pritet që deri në fund të vitit, numri i atyre që do ta trajtohen përmes Programit të jetë rreth 1000 siç ka qenë edhe vitin e kaluar, derisa të dhënat vjetore publikohen në mbyllje të vitit.
Sa i përket fondit që kjo ministri ka në dispozicion për rastet që kërkojnë trajtim jashtë Kosovës, Hoti ka thënë se është rreth 7 milionë euro.
“ Mjetet në dispozicion janë rreth 7 milionë euro, për të gjitha llojet e sëmundjeve dhe rastet që aplikojnë. Nga natyra e sëmundjeve, më së shumti raste ka nga Kardiologjia, pastaj Ortopedia, Oftalmologjia, ORL, disa raste të leukemisë dhe disa raste nga Pediatria”, ka theksuar zëdhënësi Hoti.
